信念，時間，戰爭

星期六晚同最要好的朋友去左尖沙咀亞士厘道飲野傾計。

一論寒暄後，一向比我感覺係語無倫次的Robbie，提出了一個問題：大家的信念係咩？
幫左別人，享受生活，世界和平，其中3個朋友擁有3個清澈簡潔的信念，而我同表哥仔的信念好模糊。的確，一路以來我都覺得自己好有計畫好有planning，但其實只係一個一般人會走的方向，我只係將佢copy過黎。細個喜歡玩電腦，對電腦的認識比一般人多，順理成章讀電腦，做電腦。雖然唔係唔鐘意，但哩樣野變成左個框框，電腦野以外的，一竅不通。
Martin係好耐之前，已經提議我打破哩個框。當初唔係好明，一直過緊好有規律的生活，番工打波番學食飯打機訓覺，好好地做咩變？但最近開始慢慢睇到個框，開始發覺自己一路都只係一隻井底之蛙。打破框框，並非摧毀所有規律，而是打破其中一角，讓新鮮事物進入，擴闊井口，見到更多天空。
聽過一班好友的說話，我開始找到自己的信念，我要挑戰自己，讓自己學得更多，不再只係沉迷電腦虛擬世界裡。


當晚表哥仔亦提出左一個問題：1天24小時，扣除訓覺時間之外，你覺得有多少時間係屬於自己？
當大家都係將工作回家後的1-2小時當係自己的時間時，我覺得大部份時間，甚至我番工的時候，我都係做緊自己。唔知點解，可能因為每一個決定都係我自己做，行邊步都係自己話事，我掌握我自己意向，所以我係做緊自己。當然，我份工可以隨時唔做，我當然可以有好大自由度。
唔知大家又會點答哩個問題？


最後大家傾到關於戰爭。大家都認為會係有生之年經歷戰爭，而且係貼身的戰爭。Martin會形容為任何現在所擁有的知識都會變得一無所值，所有人會只為基本求生而生存。我亦有同感。每個世界大國，都好似將一把拉得好緊的弓，對準其他大國，如美國，伊拉克，中國，俄羅斯等等。萬一其中一方一時鬆手，就會引起連鎖反應，世界大戰一觸即發。
而更令我擔心的就係全球暖化，我覺得現在這刻的地球，已經惡化都去一個不能回頭的結果。

算吧啦，可以做的又有幾多？